Gal 5 | TPZ | STEP | Kuru na to taihan ee. Suk ataeah, e Ieesuß Kristo to kon taneß hah a ra manih po Vavaasis pe Mosës. Ivëh, köß iu noß a ö nöm se sun vakis rakah, paröm nat nem hah manuh po Vavaasis pe Mosës. Eöm tomeß tavus hah em o teß nohnoh manih po Vavaasis pamëh.

bLev 19:18

Galatians 5

Ea Se Teß Taihan Tamoaan No

1 Kuru na to taihan ee. Suk ataeah, e Ieesuß Kristo to kon taneß hah a ra manih po Vavaasis pe Mosës. Ivëh, köß iu noß a ö nöm se sun vakis rakah, paröm nat nem hah manuh po Vavaasis pe Mosës. Eöm tomeß tavus hah em o teß nohnoh manih po Vavaasis pamëh.

2 Pënton vavih öm. Eöß e Pöl, eöß to sosoe ka noß neöm pan, eöm se keh iu avoeß e nem pa vatet o Vavaasis pe Mosës, manih pa pe a ö kokoaan vëh to teß non manih pa ma sionineöm, e Ieesuß Kristo to hikta onöt non a vaßaus a neöm. 3 Eöß to sosoe vaënpan hah a noß neöm, eöm se keh vaonöt këm manih pa pe a ma ö kokoaan peöm. A, eöm se vatet vavih rakah a ma Vavaasis kurus. 4 Eöm se keh koman nem pan, eöm se vavatet nem o Vavaasis pe Mosës ke Sosoenën pokaß a neöm o teß totoopin manih po epep peß, eöm to heß tonun em pe Ieesuß Kristo. A, eöm koman to tavus këh em po ururuan pe Sosoenën.

5 Ivëhkëk, manih po kikis pa Tuvuh Vasioß, ea to nat e no pe Sosoenën se pokaß en pea o teß totoopin, kuru me amot, suk ea to vaman no e Kristo. 6 O poen poanheh ne ea to vahoß rakah o vaman pea manih pe Ieesuß Kristo, ka taateß va pa pe, me a taateß va pa hikta pe a ö kokoaan vëh, eß a tah akuk manih po epep pe Sosoenën. Ivëhkëk, a taateß vëh, a taateß vaman e Ieesuß Kristo, eß a taateß pamëh to kunkuin non o vaman pea, ka iu rakah no e Sosoenën me ro upöm teß.

7 Moaan voh nöm to tavus a napan pe Ieesuß Kristo, paröm suksuk vavih rakah e nem pa ma taateß totoopin peß. Ivëhkëk, eteh to sunpip a neöm, köm hikta vavatet hah nem o vavaasis va pa soe man? 8 O vavaasis taeoh nöm to vavatet nem kuru, eß o vavaasis ko pamëh to hikta taneß non maß manuh pe Sosoenën to vaoe a no neöm. 9 Eß to teß non a soe vapipinoß to soe va non manih pan, “A siß ö is soneß na se ru manih po praoaß ko hovën o praoaß, keß sup ko nok a peret.” ^{▼▼A pusun in a soe vapipinoß vëh to teß va non manih pan, “a siß ö is soneß”, to teß va non manih po vavaasis to hikta teß man non, me a soe vëh, “keß sup ko nok a peret”, to teß va non manih pan, o vavaasis pamëh to piuk a nap peo kee vaman ee po vavaasis piuk pamëh.} 10 Eöß to soe vamaman rakah keoß peöm, e Sunön se vaßaus en peöm, köm vatet em po vavaasis peöß, paröm hikta onöt nem vatet to meoh vavaasis. Eöß to hikta nat noß peteh to vavanun non a ma kokoman peöm, ivëhkëk, koe a koman a teß pamëh to nonok va non nën. E Sosoenën se vakmis en pa teß pamëh, suk a ma vavaasis piuk peß.

11 Oman kën kea, eöß to hikta vavaasis noß pan, a napan se pe a ma ö kokoaan varih to teß ne pa ma sioniire. Ahik, eöß se keh vavaasis noß a taateß pamëh, vahvapoßnih, ka napan va Israël vövöknah avoeß e ne peöß? Eöß se keh vavaasis avoeß e noß peöm pa pe a ma ö kokoaan, a, a soe nöß to vavaasis suk noß a mët pe Kristo to hikta onöt non a vaharaß vahat a ma kokoman pa napan va Israël. 12 A napan varih to vavanun ne a ma kokoman peöm, eöß to iu noß a napan poë varih se onon koman hah rea.

13 Oman kën kea peöß, e Sosoenën to vaoe en nös peöm, köm taihan këh em maß po matop va po Vavaasis pe Mosës, paröm teß vavih e nem. Ivëhkëk, eöm tomeß koman nem pan, eöm to taihan voh em to nonok avoeß hah e nem pa ma taateß hat no a ma komëneöm to iu ne? Ahik! Eöm se nat nem kokoman va nem nën. Suk ataeah, eöm papaeh se teß va nem manih po teß kunah paan o upöm teß pe Sosoenën. Paröm iu nem a ma upöm peöm ko vaßaus nem raoe. 14 A ma soe kurus va po Vavaasis pe Mosës to teß hop avoes rakah e ne pa paeh a soe ro, ka soe pamëh ivaßih,

“Iu a meh teß, vamanih pa ö nën to iu koman hah va ka nom”. ^b
15 Ivëhkëk, eom se matop nem, eöm tomeß töön nem pa vaheheve manih topnineöm, ko ro vahik em.

A Taateß Pa Tuvuh Vasioß Me A Taateß Va Po Sionin

16 Ka soe peöß to teß va non manih, koe ka Tuvuh Vasioß vatotoopin nö non a hanan nöm to suksuk nö nem. Eöm se keh vatet a soe peß, a, eöm hikta se nok nem a ma taateß hat no a ma kokoman peöm to iu ne. 17 Ea to nat rakah va e no manih pan, a iu hat va pa komaara to kehkeh vöknah rakah e non sih pa Tuvuh Vasioß. Ka Tuvuh Vasioß me to kehkeh vöknah rakah me e non po iu hat vëh to teß non pa komaara. Ka tah nöm to kehkeh nok nem, ne eöm to hikta onöt nem a nok. 18 Ivëhkëk, a Tuvuh Vasioß se keh vovoh nö ka non neöm, a, eöm to hikta onöt nem a teß hah manih paan o Vavaasis pe Mosës.

19 Eöm to nat vahik voh em pa ma taateß hat no a koman a teß to iu nok non, a ma taateß hat poë varih to teß va ne manih, taateß rëhrëh, me a taateß va pa poa teß oeteß koman me a poa köövo koman to koroh vëtkin, pare nok a taateß hat, me a taateß va po kokoman to kat o kokoman ka teß nok a taateß rëhrëh. 20 Me a taateß va pa hin suk a tah akuk to hikta teß non pan e Sosoenën, me a taateß kiu po teß ororaß, me a taateß varërëës, me a taateß vaato vasukaß, me a taateß vaheheve, me a taateß peat, me a taateß puhioß o teß varih to teß vavih ne, me a taateß amamun, me a taateß vaato vasukaß ko taki, me taateß vaëh kiiki manih po vuteß, 21 me a taateß manin a tah pa meh teß. Me a taateß kaak, me a taateß vatösoe, me a ma meh taateß taneah. Moaan voh nöß to soe voh keoß peöm. Ka kuru nöß to se sosoe avoeß ke noß peöm pa soe pamëh. A napan to nonok ne a ma taateß poë varih, ee to hikta antoen ne a teß manih koman a Matop Vih pe Sosoenën.

22 Ivëhkëk, o poen no a Tuvuh Vasioß to matop a ro ra, eß to kunkuin en pa ma kokoman pea pa iu e Sosoenën, me a ma upöm teß. Ivëh, ne ea se nok suk rakah a ma vu taateß to teß va ne manih, taateß iu teß me e Sosoenën, me a taateß teß me o vaeö to taneß maß manuh pe Sosoenën, me a taateß teß vatö, me a taateß hikta heve vëvëhöß, me a taateß uruan ko vaßaus o upöm teß, para vataare raoe a taateß vih, me a matop a taateß. 23 Me a taateß teß vöknah, me a taateß pënton soe ko këh maß o iu va pa komaara. Manih no ahikta pah taateß to soepip non a ma taateß poë varih. 24 A napan pe Ieesuß Kristo to taihan ee, ko iu hat va pa komëëre to hikta matop hah non raoe. O iu hat pamëh to teß non pa komëëre to teß va non manih, pee to vahan poë pa kuruse. 25 A Tuvuh Vasioß to heß voh en pea po toßtoß voon. Ivëh, ka se vatet vavih rakah o iu pa Tuvuh Vasioß, keß matop a rora. 26 Ea se nat no kë koman hah no a ëhnaara, para nat no nonok no a ma taateß hat manih po upöm teß, marën a vaheve raoe, kee heve ko taneo o vapus, me ea se nat no manin a ma tah po upöm teß.